យ៉ាន់ម៉ានឹងដោះស្រាយបញ្ហារបស់អតិថិជនហើយនឹងបន្តល្បងសមត្ថភាពក្នុងការបង្កើតសង្គមនាពេលអនាគតនិងធ្វើឲ្យជីវិតមនុស្សមានភាពសម្បូរបែប។

គន្លឹះក្នុងការបញ្ជានាវាដោយស្វ័យប្រវត្តិគឺសមត្ថភាពប៉ាន់ស្មានទីតាំងខ្លួនឯងដើម្បីកំណត់ទីតាំងរបស់នាវា។ ទោះបីជាមានលំអៀងប៉ុន្មានម៉ែត្រកើតឡើងជាមួយGNSS រួមទាំងប្រព័ន្ធGPSក៏ដោយ យើងមានគោលដៅកាត់បន្ថយកំហុសឲ្យនៅក្នុងរង្វង់ពីរបីដេស៊ីម៉ែត្រជាមួយនឹងប្រព័ន្ធចូលចតស្វ័យប្រវត្តិរបស់យើង។ ក្នុងដំណាក់កាលដំបូងនៃការអភិវឌ្ឍ យើងបានប្រើស៊ីនេទិចពេលវេលាជាក់ស្តែង(Real time kinematic(RKT)) ដែលត្រូវបានប្រើនៅក្នុងត្រាក់ទ័ររ៉ូបតរបស់យ៉ាន់ម៉ាដែលចូលរួមយ៉ាងសកម្មនៅក្នុងវិស័យកសិកម្ម។ យើងបានដំឡើងស្ថានីយមូលដ្ឋានមួយនៅចំហៀងកំពង់ផែហើយបានបង្កើតប្រព័ន្ធដែលបញ្ចេញសញ្ញាកែតម្រូវដើម្បីកែលម្អភាពត្រឹមត្រូវ។ ទោះយ៉ាងណា ក៏ដោយវាអាចត្រូវបានប្រើតែនៅកំពង់ផែជាក់លាក់មួយដែលស្ថានីយមូលដ្ឋានត្រូវបានដំឡើង ហើយវាក៏មានបញ្ហាសុវត្ថិភាពផងដែរដោយមិនមានសេនស៊័រដើម្បីចាប់ដឹងបរិស្ថានជុំវិញពិតប្រាកដរបស់វា។ សម្រាប់ហេតុផលនេះ ជំហានបន្ទាប់គឺបំពាក់នាវាជាមួយ 3D-LIDAR ដែលជាសេនស៊័រដែលចាប់ដឹងបរិស្ថានជុំវិញ ហើយផ្តោតលើការអភិវឌ្ឍប្រព័ន្ធដែលប៉ាន់ស្មានទីតាំងផ្ទាល់របស់វាជាមួយនឹងភាពត្រឹមត្រូវខ្ពស់ដោយវាស់វត្ថុជុំវិញ។

ជាលទ្ធផល យើងបានទទួលជោគជ័យក្នុងការធ្វើឲ្យកំហុសប៉ាន់ស្មានទីតាំងដោយខ្លួនឯងស្ថិតក្នុងរង្វង់ពីរបីដេស៊ីម៉ែត្រទោះបីគ្មានស្ថានីយមូលដ្ឋានក៏ដោយ។ លើសពីនេះទៅទៀត វាអាចបញ្ជាទូកដោយស្វ័យប្រវត្តិដោយប្រើបរិស្ថានជុំវិញរបស់វាដោយគ្រាន់តែកំណត់ទីតាំងចូលចត។ ចាប់តាំងពីពេលចាប់ផ្តើមអភិវឌ្ឍ យើងអាចកាត់បន្ថយពេលវេលាដែលត្រូវការសម្រាប់ចូលចតដោយស្វ័យប្រវត្តិពី4នាទីទៅ2នាទីកន្លះដែលជាកម្រិតអនុវត្តបាន។ ក្នុងកំលុងពេលធ្វើនាវាចរណ៍នៅឯនាយសមុទ្រ ផែនទីធំទូលាយមិនលម្អិតត្រូវបានបង្កើតឡើងដោយរ៉ាដាដើម្បីកំណត់ផ្លូវនាវាចរណ៍។ ពេលកំពុងធ្វើដំណើរតាមផ្លូវនេះ បរិស្ថានជុំវិញត្រូវបានរកឃើញយ៉ាងលម្អិតដោយប្រើ 3D-LIDAR ដើម្បីឲ្យអាចចាប់ដឹងឧបសគ្គនៅក្បែរនោះ។ លើសពីនេះទៀត 3D-LIDAR ត្រូវបានប្រើដើម្បីបង្កើតផែនទីដែលមានគុណភាពរូបភាពខ្ពស់សម្រាប់ការធ្វើនាវាចរណ៍និងចូលចតក្នុងទីចង្អៀត។ ប្រព័ន្ធចូលចតដោយស្វ័យប្រវត្តិជ្រើសរើសផ្លូវដែលមានសុវត្ថិភាពនិងមានហានិភ័យនៃការប៉ះទង្គិចទាប ហើយដំណើរការដោយស្វ័យប្រវត្តិចាប់ពីការធ្វើនាវាចរណ៍រហូតដល់ការចូលចត។ លទ្ធផលជោគជ័យគឺទទួលបានពីការប្តេជ្ញាចិត្តមិនដកថយរបស់ក្រុមអភិវឌ្ឍដើម្បីបង្កើតប្រព័ន្ធមួយដែលអ្នកប្រើប្រាស់អាចធ្វើនាវាចរណ៍បានដោយសុវត្ថិភាពនិងចូលចតនាវាដោយសេរីនៅក្នុងទីតាំងរបស់ខ្លួនដោយគ្មានភាពតានតឹង។