ការដឹកជញ្ជូនអាចត្រូវបានកំណត់ពេលដោយផ្អែកលើការគ្រប់គ្រងបរិស្ថាននៃការលូតលាស់និងប្រមូលទិន្នន័យដោយស្វ័យប្រវត្តិ

សេនស៊័រឥតខ្សែជាច្រើនត្រូវបានដំឡើងនៅក្នុងផ្ទះកញ្ចក់ឆ្លាតវ័យ។ សីតុណ្ហភាព សំណើម កម្រិតពន្លឺ និងកម្រិតកាបូនឌីអុកស៊ីតត្រូវបានវាស់តាមរយៈសេនស៊័រអេឡិចត្រូនិចនិងបរិស្ថាន ហើយទិន្នន័យដែលប្រមូលបាន ត្រូវបានបញ្ជូនទៅកុំព្យូទ័រ។ លើសពីនេះទៀត ទិន្នន័យនេះក៏ត្រូវបានផ្ទុកនៅក្នុងក្លោដ(Cloud)ផងដែរ។ រហូតមកដល់បច្ចុប្បន្ន កុំព្យូទ័រមួយបានគ្រប់គ្រងឧបករណ៍នីមួយៗ ហើយលក្ខខណ្ឌបរិស្ថានជាច្រើនត្រូវបានគ្រប់គ្រងដាច់ពីគ្នា។ ដោយសារតែគ្រឿងបរិក្ខារនីមួយៗមានខ្សែ ធ្វើអោយទីតាំងនិងចំនួនរបស់វាមានកំណត់។ ប៉ុន្តែនៅក្នុងផ្ទះកញ្ចក់ឆ្លាតវ័យ កុំព្យូទ័រតែមួយអាចគ្រប់គ្រងឧបករណ៍ជាច្រើន ដោយកាត់បន្ថយចំនួនខ្សែឲ្យតិចបំផុត ហើយទិន្នន័យទាំងអស់ត្រូវបានប្រមូលដោយស្វ័យប្រវត្តិទៅកុំព្យូទ័រតាមរយៈបណ្តាញឥតខ្សែ។ មិនចាំបាច់ត្រូវត្រលប់ទៅមកផ្ទះកញ្ចក់ទេ ពីព្រោះការរៀបចំនីមួយៗសម្រាប់បរិស្ថានដាំដុះរហូតដល់ការស្រោចទឹកដំណាំ គឺត្រូវបានគ្រប់គ្រងដោយស្វ័យប្រវត្តិដោយផ្អែកលើរូបមន្តដែលបានកំណត់ទុកជាមុន។

ចាប់តាំងពីប្រព័ន្ធថ្មីទាំងស្រុងត្រូវបានអនុវត្ត យើងមិនមានបទពិសោធន៍គ្រប់គ្រាន់ក្នុងដំណាក់កាលអភិវឌ្ឍទេ។ យើងបានធ្វើការពិភាក្សាជាច្រើនលើកដើម្បីវាយតម្លៃឡើងវិញនូវអត្ថន័យនៃការបន្ថែមតម្លៃដល់អតិថិជនរបស់យើងតាមរយៈផលិតផលរបស់យើង ហើយបានទទួលជោគជ័យក្នុងការបង្កើតថ្មីរបស់យើង។ វាក៏មានបញ្ហាទាក់ទងនឹងក្រុមអភិវឌ្ឍដែលជាអ្នកជំនាញលើ IoT និង AI ប៉ុន្តែថ្មីថ្មោងជាមួយនឹងកសិកម្ម។ តើដំណាំប្រភេទណាត្រូវការការថែទាំប្រភេទណា? នេះគឺជាប្រភេទសំណួរនិងបញ្ហាប្រឈមដែលយើងបានដោះស្រាយម្តងមួយៗដោយមានការសហការពីសមាជិកនៃមជ្ឈមណ្ឌលនវានុវត្តន៍ជីវសាស្ត្រនិងក្រុមហ៊ុនដៃគូដទៃទៀតដែលជាអ្នកជំនាញខាងរុក្ខជាតិនិងកសិកម្ម។ បន្ទាប់ពីបង្កើតគំរូជាច្រើនម្តងហើយម្តងទៀត ជាចុងក្រោយគំរូដែលទទួលបានជោគជ័យត្រូវបានបង្កើតឡើងសម្រាប់ផ្ទះកញ្ចក់ឆ្លាតវ័យ។

ជាមួយនឹងការចាប់ផ្តើមសាកល្បងផ្ទះកញ្ចក់ យើងចាប់ផ្តើមដាំប៉េងប៉ោះ។ យើងអាចកំណត់ពេលវេលាដោយខ្លួនឯងនូវពេលប៉េងប៉ោះទុំនិងប្រព័ន្ធសម្រាប់ប្រមូលទិន្នន័យនេះ។ យើងក៏បានបង្កើតវិធីសាស្ត្រអាល់ហ្គោរីត(algorithm) ដែលប៉ាន់ស្មានការទុំរបស់ប៉េងប៉ោះពីរូបភាពរាប់ម៉ឺនដែលប្រមូលបានតាមរយៈកាមេរ៉ា។ ការប្រើប្រាស់បច្ចេកវិទ្យាព័ត៌មានរីកចម្រើនជាមួយនឹងភាពវៃឆ្លាតនៅពេលបរិមាណទិន្នន័យកើនឡើង ដែលអនុញ្ញាតឱ្យសីតុណ្ហភាពនិងសំណើមត្រូវបានកែតម្រូវនិងដាក់កាលវិភាគបញ្ជូនផលិតផលដោយជាក់លាក់។ វាក៏នាំទៅរកដំណោះស្រាយផ្សេងទៀតនៃការកែលម្អភាពត្រឹមត្រូវនៃការគ្រប់គ្រងដោយស្វ័យប្រវត្តិនិងសន្សំសំចៃថាមពល។ នៅពេលអនាគតយើងសង្ឃឹមថានឹងដំឡើងផ្ទះកញ្ចក់ទាំងនេះនៅតាមសាកលវិទ្យាល័យដើម្បីជំរុញការស្រាវជ្រាវបន្ថែមទៀតលើការប្រមូលនិងប្រើប្រាស់ទិន្នន័យ។