SOLUTION 01 / Environmental Load Reducing

ការបំភាយផ្សែងពុលកាន់តែតិចនិងថាមពលកាន់តែខ្លាំង ម៉ាស៊ីនសម្រាប់នាវាដែលប្រើរួមបញ្ចូលគ្នាទាំងម៉ាស៊ូតនិងឧស្ម័នឥន្ធនៈ។

ផ្នែកគ្រប់គ្រងផលិតផលថាមពលធំ អាជីវកម្មដំណោះស្រាយថាមពល
ឈរលើគោលគំនិតនៃការការពារបរិស្ថានពិភពលោក បទប្បញ្ញត្តិនៃការបំភាយត្រូវបានរឹតបន្តឹងបន្ថែមនៅក្នុងពិភពសមុទ្រ ហើយការកាត់បន្ថយសារជាតិបំពុលបរិស្ថានដូចជា NOx និង SOx បានក្លាយជាបញ្ហាប្រឈម។ ដើម្បីកាត់បន្ថយផលប៉ះពាល់បរិស្ថាន យ៉ាន់ម៉ាបានបង្កើតម៉ាស៊ីនប្រើឥន្ធនៈពីរប្រភេទដែលអាចផ្លាស់ប្តូរការប្រើរវាងម៉ាស៊ូតនិងឥន្ធនៈឧស្ម័នធម្មជាតិ (LNG)។ ការដំឡើងម៉ាស៊ីនប្រើឥន្ធនៈពីរប្រភេទក្នុងនាវាសណ្ដោងជាដើមកំពុងមានការកើនឡើង។

ISSUE

ម៉ាស៊ីនដែលគិតគូរពីបរិស្ថានពិភពលោកនិងប្រតិបត្តិការដោយប្រសិទ្ធផលសន្សំសំចៃខ្ពស់

នាវាធំៗដែលកំពុងប្រតិបត្តិការនៅសមុទ្រជុំវិញពិភពលោក ត្រូវបានបំពាក់ដោយម៉ាស៊ីនដែលមានថាមពលខ្លាំង។ បញ្ហាដែលពិភពលោករបស់យើងកំពុងប្រឈមមុខសព្វថ្ងៃនេះគឺសារជាតិបំពុលខ្យល់ដែលចេញពីការបំភាយនៃម៉ាស៊ីនធំៗទាំងនោះ។ ក្នុងប៉ុន្មានឆ្នាំចុងក្រោយនេះ ការប្រើប្រាស់ឧស្ម័នធម្មជាតិកំពុងទទួលបានការចាប់អារម្មណ៍។ ឧស្ម័នធម្មជាតិពង្រាវ(LNG) ល្អចំពោះបរិស្ថាននិងអាចកាត់បន្ថយឧស្ម័នផ្ទះកញ្ចក់។ ហេតុដូច្នេះហើយ ក្រុមហ៊ុនយ៉ាន់ម៉ាបានចាប់ផ្តើមអភិវឌ្ឍម៉ាស៊ីនប្រើឥន្ធនៈពីរប្រភេទដែលអាចប្រើប្រាស់ដោយមានភាពបត់បែនបានទាំងLNGនិងម៉ាស៊ូត ដែលមានអត្ថប្រយោជន៍គឺល្អចំពោះបរិស្ថាននិងភាពងាយស្រួលរកបានកាន់តែទូលំទូលាយ។ យើងបានកំណត់គោលដៅខ្ពស់ដើម្បីអភិវឌ្ឍម៉ាស៊ីនថ្មីដែលអនុលោមតាមបទប្បញ្ញត្តិអង្គការសមុទ្រអន្តរជាតិ(IMO) កម្រិតទី3អំពីNOx(IMO3) និងបទប្បញ្ញត្តិអំពីSOxសម្រាប់ដែនសមុទ្រទាំងមូល ដោយផ្អែកលើគម្រូដែលអាចទុកចិត្តបានដែលអាចបន្តស្វែងរកការកែលម្អតម្លៃវដ្តជីវិត(LCV) សម្រាប់អតិថិជន។

បទប្បញ្ញត្តិកម្រិតទី3(IMO3) ដែលចូលជាធរមានតាំងពីថ្ងៃទី1ខែមករាឆ្នាំ2016 គឺIMOកំណត់ស្តង់ដារនៃការគ្រប់គ្រងការបំភាយNOx។ IMO3 ដែលកំហិតការបំភាយ80% ទាបជាងបទប្បញ្ញត្តិកម្រិតទី1 ត្រូវបានអនុវត្តនៅក្នុងដែនសមុទ្រដែលត្រូវបានកំណត់ដែលហៅថាតំបន់គ្រប់គ្រងការបំភាយNOx (N-ECA)។ តំបន់ឆ្នេរនៅសហរដ្ឋអាមេរិកនិងកាណាដា សមុទ្រការីប៊ីននៃសហរដ្ឋអាមេរិក សមុទ្រខាងជើង និងសមុទ្របាល់ទិក ត្រូវបានដាក់កំហិតអំពីSOx រួចហើយ ហើយតំបន់ឆ្នេរនៅសហរដ្ឋអាមេរិកនិងកាណាដាត្រូវបានកំហិតអំពីNOx រួចហើយ។ សមុទ្រខាងជើង និងសមុទ្របាល់ទិកនឹងត្រូវចូលជាគោលដៅនៃបទប្បញ្ញត្តិចាប់ពីថ្ងៃទី1ខែមករាឆ្នាំ2021តទៅ។

SOLUTION

សម្រេចបានការធ្វើនាវាចរណ៍ដោយសុវត្ថិភាពនិងស្ថិរភាពដោយបច្ចេកវិទ្យាយ៉ាន់ម៉ា

ក្រុមហ៊ុនយ៉ាន់ម៉ាបានបង្កើតម៉ាស៊ីនប្រើឥន្ធនៈពីរប្រភេទដែលរួមបញ្ចូលបច្ចេកវិទ្យាគ្រង់គ្រងលំហូរខ្យល់ដោយភាពត្រឹមត្រូវខ្ពស់។ ការរក្សាស្ថានភាពចំហេះល្អបំផុតគ្រប់ពេល វាធ្វើឱ្យប្រតិបត្តិការកាន់តែគួរឱ្យទុកចិត្តនិងមានស្ថិរភាព ខណៈពេលដែលប្រើទាំងហ្គាសនិងម៉ាស៊ូត។ លើសពីនេះទៀត ប្រព័ន្ធគ្រប់គ្រងដែលប្លែកគេ ត្រូវបានដាក់បញ្ចូលដើម្បីធានាសុវត្ថិភាពកំលុងពេលប្រតិបត្តិការនៅលើសមុទ្រក្នុងពិភពលោក។ តាមរយៈការធ្វើឱ្យឧបករណ៍មានភាពចម្រុះ យើងទទួលបាននូវសុវត្ថិភាពនិងអតិរេកភាពដែលជួយឱ្យការធ្វើនាវាចរណ៍មានសុវត្ថិភាពដោយម៉ាស៊ីនតែមួយប៉ុណ្ណោះក្នុងមួយអ័ក្ស។ លើសពីនេះទៀត វាត្រូវបានបំពាក់ដោយប្រព័ន្ធគ្រប់គ្រងសមាមាត្រឥន្ធនៈនិងខ្យល់ និងប្រព័ន្ធចាប់ដឹងម៉ាស៊ីនលាន់សំឡេង(knocking)។ ទោះបីនៅពេលប្រើឥន្ធនៈឧស្ម័នធម្មជាតិដែលមានកម្រិតមេតានទាប ដែលគេព្រួយបារម្ភអំពីចំហេះខុសប្រក្រតី(ម៉ាស៊ីនលាន់សំឡេង)ក៏ដោយ សម្ពាធស៊ីឡាំងត្រូវបានវិភាគក្នុងពេលវេលាជាក់ស្តែង។ តាមរយៈការបញ្ជាល្បឿនលឿន វាអាចបញ្ជៀសបញ្ហាម៉ាស៊ីនលាន់សំឡេង។ ម៉ាស៊ីនប្រើឥន្ធនៈពីរប្រភេទអាចប្រើបានជាមួយនឹងឧស្ម័នធម្មជាតិពីទូទាំងពិភពលោកហើយអាចដំណើរការបានដោយគ្មានការរឹតត្បិតថាមពល។ ក្នុងកំលុងពេលធ្វើនាវាចរណ៍ វាអាចប្តូរពីប្រើម៉ាស៊ូតទៅជាប្រើហ្គាសសូម្បីតែនៅបញ្ចេញកម្លាំងអតិបរមាក៏ដោយ។ ក្នុងករណីមានអាសន្ន វាប្តូរពីការប្រើហ្គាសទៅជាការប្រើម៉ាស៊ូតដោយសុវត្ថិភាពនិងភ្លាមៗ។

RESULT

ឆ្លើយតបនឹងបទប្បញ្ញតិបរិស្ថានតឹងរឹង

ម៉ូដែលដែលត្រូវបានអភិវឌ្ឍគឺ6EY26DF នៅពេលប្រើហ្គាស យើងសម្រេចបាននូវការកាត់បន្ថយប្រហែល 80% នៃNOx (អាសូតអុកស៊ីត) 25% នៃCO2(កាបូនឌីអុកស៊ីត) 99% នៃ SOx (ស្ពាន់ធ័រអុកស៊ីត)និងPM(ភាគល្អិតនិចល) បើប្រៀបធៀបទៅនឹងម៉ូដែលមុនរបស់យើងនៅក្នុងចំណាត់ថ្នាក់ម៉ាស៊ីនដូចគ្នាគឺ 6EY26W។ តាមរយៈបំពេញតាមស្តង់ដារIMOកម្រិតទី3 ខណៈពេលដែលរក្សាបាននូវគុណសម្បត្តិរបស់វាដូចជាប្រសិទ្ធផលសន្សំឥន្ធនៈនិងថាមពលខ្លាំង យើងបានបង្កើតបច្ចេកវិទ្យាថ្មីដែលដោះស្រាយបញ្ហាពិភពលោកក្នុងការកាត់បន្ថយផលប៉ះពាល់បរិស្ថាន និងការឡើងចុះនៃតម្លៃប្រេង។ យ៉ាន់ម៉ាបាននិងកំពុងជំរុញការវិវឌ្ឍន៍របស់ម៉ាស៊ីន ហើយនឹងបន្តធ្វើពិពិធកម្មបច្ចេកវិទ្យាសម្រាប់មនុស្សជំនាន់ក្រោយ។

INTERVIEWដំឡើងនៅលើអ៊ិស៊ីន(Ishin)
ដែលភ្ជាប់មនុស្សឱ្យក្លាយជាកម្លាំងជំរុញនៃគម្រោង

នាវាសណ្តោងអ៊ិស៊ីន បានចូលរួមក្នុងការងារសន្តិសុខសម្រាប់នាវាដឹកទំនិញធំៗដែលធ្វើដំណើរនៅឈូងសមុទ្រអូសាកានិងសមុទ្របិទជិតសេតូ និងការសណ្តោងចេញចូលកំពង់ផែចាប់តាំងពីខែមីនាឆ្នាំ2019។ វាកំពុងទាក់ទាញការចាប់អារម្មណ៍ក្នុងនាមជានាវាសណ្តោងដំបូងគេនៅប្រទេសជប៉ុនដែលប្រើប្រាស់ឧស្ម័នធម្មជាតិពង្រាវជាឥន្ធនៈ ហើយបំពេញតាមស្តង់ដារកូដIGF (*)។ ម៉ាស៊ីនប្រើឥន្ធនៈពីរប្រភេទរបស់យ៉ាន់ម៉ាគឺ6EY26DF ត្រូវបានបំពាក់ជាម៉ាស៊ីនរុញច្រានចម្បងសម្រាប់ "អ៊ិស៊ីន"។

នាវាសណ្តោងនិងលក្ខណៈដំណើរការរបស់វា អាចផ្តល់បន្ទុកធ្ងន់និងភ្លាមៗលើម៉ាស៊ីនដោយសារតែការរុញនិងទាញកប៉ាល់ឬទំនិញដែលធំជាងនិងធ្ងន់ជាងវា។ លោកដូអ៊ិ ដែលអ្នកទទួលបន្ទុកនៃការធ្វើតេស្តនេះ រំលឹកឡើងវិញថា "យ៉ាន់ម៉ាមិនមានប្រវត្តិផលិតម៉ាស៊ីនប្រើហ្គាសសម្រាប់ផលិតផលនាវាទេ ហើយប្រភេទប្រើហ្គាសជាទូទៅមិនធន់ជាមួយនឹងការប្រែប្រួលបន្ទុកទេ។ ក្នុងនាមជាផលិតផលដំបូងដែលត្រូវផលិត ខ្ញុំមានអារម្មណ៍ថាគម្រោងនេះពិតជាលំបាកណាស់។" "នៅក្នុងការប្រជុំជាមួយដៃគូពាក់ព័ន្ធ គេបានសួរថាយើងថាតើវាអាចដំណើរការបានឬទេ ហើយគេប្រាប់ថាពួកគេមិនអាចប្រើនាវាសណ្តោងទេប្រសិនបើវាមិនបំពេញតាមស្តង់ដារ។ បើទោះបីជាមានការប្រើពាក្យធ្ងន់ខ្លះៗក៏ដោយ យើងបានធ្វើការជាមួយគ្នាដើម្បីបំពេញតាមការរំពឹងទុកនិងបន្តដោះស្រាយបញ្ហា" លោកដូអ៊ិ និងលោកគុបុ ដែលជាប្រធានផ្នែករចនាប្រព័ន្ធបាននិយាយ។ លោកនិស៊ិមូរ៉ា ដែលទទួលបន្ទុកលើការរចនាម៉ាស៊ីន បាននិយាយថា "យើងបានវាយតម្លៃយ៉ាងហ្មត់ចត់ទៅលើផ្នែកសុវត្ថិភាពដើម្បីឲ្យនាវិកអាចប្រើប្រភេទប្រើហ្គាសដោយមិនបារម្ភ ហើយព្រមទាំងល្អដល់បរិស្ថាន។"

នៅក្នុងការធ្វើនាវាចរណ៍លើកដំបូង សមាជិកនៃផ្នែកសេវាកម្មក៏ដូចជាផ្នែកអភិវឌ្ឍន៍ បានឡើងលើនាវាសណ្តោង។ ដៃគូសហការទាំងអស់បានកោតសរសើរថាស្មារតីនៃការរួបរួមគ្នាត្រូវបានកសាងឡើងនៅពេលដែលទូកបានចេញជារូបរាង។ នោះគឺជាក្តីរីករាយពិតប្រាកដនិងជាសមិទ្ធផលអស្ចារ្យ។ គម្រោងនេះត្រូវបានសម្រេចដោយសារការជំរុញរួមគ្នារបស់អតិថិជននិងយ៉ាន់ម៉ា។

* កូដ IGF ៖ កូដអន្តរជាតិអំពីសុវត្ថិភាពដែលកំណត់លក្ខខណ្ឌសុវត្ថិភាពសម្រាប់នាវាដែលប្រើហ្គាសឬឥន្ធនៈដែលមានសីតុណ្ហភាពចំហេះទាបដទៃទៀតដែលចេញផ្សាយក្នុងឆ្នាំ2017។

* ព័ត៌មានពីផ្នែកនាយកដ្ឋានដែលស្ថិតនៅគឺគិតត្រឹមខែមេសាឆ្នាំ2020។